سهيلة17 عضو مشارك
عدد المساهمات : 119 تاريخ التسجيل : 29/08/2010 العمر : 31
| موضوع: الخطبة بين بكري واليوم الجمعة يوليو 29, 2011 11:42 pm | |
| السلام عليكم ورحمة الله وبركاته
.................
جدي كيفاه زوجوه ؟؟؟؟
خرج يخدم الصباح وكي رجع لعشية لقا مرا فالدار قاللهم شكون هدي قالولو مرتك ههه
ظك السيد يخير ويختار ولازم زينة ولازم نعرفها ولازم نقعد معاها ولازم نتفاهمو ويقعدو سنين خاطبين وفي لخر شهر ويطلقو يقولك ماتفاهموش
بكري الطفلة يجيها بباها يقوللها يا بنتي خطبني فيك واحد وراني عطيتو كلمة...سجي روحك عرسك اهو قريب الطفلة..ان شاء الله يابابا....ووجهها ماتفسريه لا احمر لا اخضر من الحشمة
اليوم الطفلة تجي لامها تقوللها اهو واحد جاي يخطبني قابلين ولا لالا غير هو اللي نديه والا ماديتوش نقتل روحي هههه
البارح وقت يجو اهل لعريس يخطبو موالين الطفلة يشرطو الهنا وراحة البال
اليوم يشرطو بارير 80 مليون والا ماعندكش تربح
بكري كانت لعروس تخرج على حمارة وفي احسن الاحوال على عود ولا جمل
اليوم يشرطو بنتهم تتزف في كوبتير والا مكاش ليموزين معليش ههه تصلح
قبل وقتنا كانت لعروس تزوج بخاتم فضة و مصحف وتدخل فالدار الكبيرة
اليوم قالك 30 مليون صداق وخيط الروح وتارزي نتاع 35 مليون وبرطما f4 وشهر العسل في ماليزيا ههه
جا وقت الفاتحة بكري يمات لعريس تدخل بالقضيان وبالكباش على اهل الطفلة وتلبس البنت خاتم ابيض ذهب ولا فضة المهم ابيض
اليوم ام لعريس تلقايها مكوديا وتشنف على كنتها حتى قبل ماتديها ومن اللي تدخل وهي المشاحنات مع نسابها تخرج منهم بوكي النوار اللي جابتو في يدها ههه
بكري كان العرس يندار في الدار الكبيرة مش معناها كبيرة واسعة مي دار الشيخ يا لوكان بيت وكوزينة والعرس يبدا شهر قبل الجيران تعاون الحلاوي تتخدم الفراش يتغسل الحيوط تتتسبغ المهم الناس كامل تفرح لبعضاها وتتعاون
اليوم يكرو لاصال نص نهار اللي يروح ليهم مايلقاش وين يسطاسوني ويجيبو الحلاوي من برا القهوة من برا كلشي من برا وفي لعشية يولو لدار يطفو الضو كي شغل لا عرس لاوالو
بكري الراجل ما يشوفش مرتو حتى يدخل عليها
اليوم قالك هو اللي يصدرها هههه
في صباح لعروسة كانو فحلات بكري صباح عرسهم يديرو قصعة نتاع بغرير والا غرايف
تصبح تحوس عالحفافة وتخمل فلافاليز باش تروح تدير شهر العسل
بكري كان كلشي حلو ورغم انو الراجل كان مايعرفش المرا لكن كانو يكونو اسر ويعمرو مع بعض ويربو اجيال واجيال
اليوم يعرفها 10 سنين قبل الزواج ويقعدو مزوجين شهر ويتطلقو ؟؟؟؟
.............
سلام عليكم
تحياتي | |
|